جوهر* قاللي
اكتب و انسى القافية شوية
حرر قلمك
انطق عبّر
حرف و معنى
فكرة و صورة
حس بنبض الكلمة الميت
و انفخ فيها
قولها كوني راح هاتكونلك
جوهر قاللي
انسى قديمك و اقلع توبك
اوعى تخاف من عورة حرفك
لولا العورة ما كنت هتبقى
شوف اطرافك فين اولها
و امحي اخرها
اصل الاخر معنى نهايتك
جوهر قاللي
اركب فكرة و ارمي لجامها
اشطح بيها و سيبها ترفرف
تعلا و تهبط
تخبط راسك
تلمس رجلك
عيش دوامة فكرك لكن
اعمل نجمة و سيب اعصابك
رغم الموجة هتفضل عايم
و كل قيودك تغطس عنك
جوهر قاللي
اوعى تخلي آخر حرف في سطرك حدك
جوهر * : الشاعر مصطفى جوهر
تعليقات
جوهر مين فى الزحمه دى هى
جوهر ضاع
يوم اتكلم من غير حرفه
ضيع شرفه
اصل الكلمه الكلمه دى شرفه
ينفع نلغى الكلمه ؟
طب ايه يتفضل
منذ سنوات ونحن نتحدث عن التحديث والغاء القديم
ولكن ان تكون الثورة بغير حدود معناه الفوضى
الشعر له اصول وضوابط
واذا اردنا ان ننشىء شيئا جديدا لا يرتبط بتلك القواعد فلماذا نريد ان نتقيد بالمسمى وان نقول عنه شعرا لم لانضع لع اسما جديدا كجزء من التجديد ؟
تحياتى دوما
لو ما اتسجنش الكلام ف القافيه لكن ما سابتوش الموسيقى و كان له فكره يبقى مش عاوزين منه اكتر من كده
جميل يا دكتور
برغم تحفظي على بعض المواطن في التعليق
الخاصة بتناول صاحب الفكرة
بدلا من التركيز على الفكرة
أقدر اقول
ان رأيك متناقض في جزء مهم
بتتكلم فوق عن الكلمة و عدم تضييعها
و بتتكلم تحت عن الاطار و القواعد و الضوابط
التحرر من القافية هل هو تضييع للكلمة
؟؟؟؟؟
ما العلاقة
أظن التحرر منها هو رفع لقيمة الكلمة
بحيث تكون الكلمة هي الميزان الأوحد للتقييم
دون أن يأخذك بريق القالب
هو بحث عن الجوهر
الشاعر هنا يقدم لك فتاة بدون ميكياج
حتى ترى أصل الجمال
و تلك هي الكلمة أصل الجمال
تحياتي لرأيك
و تواصلك الذي يثلج صدري دوما
فى البدايه
عظيم احترامى واعتذارى لك ولجوهر
ولكن صدقنى اعتقدت ان النص من تأليفك
وأن الإسم على العموم وعلقت على ذلك ولم انتبه الى التنويه الأخير باسمه او لم افهمه
واشهد الله تعالى على ذلك
اما بخصوص الكلمه
ففرق بين تضييع الكلمه والقافيه
فتضييع القافيه تضييع للشعر
ويمكن لاى انسان ان يكتب من الكلام ما شاء وانا اول من يفعل ذلك واسميها خواطر او اخراج لاشياء بداخلى او ما الى ذلك
فالكلمة فى حد ذاتها عنوان للهويه وجزء من لا يتجزء منطرق التعبير عن الإحساس وغيره
ولكن هل تجدنى اطلق على ما اكتب شعرا ؟
فرق بين هذا وذاك
بكل الحب والأخوة والموده
عشان اقول جوهر قالى :)
مش هقدر اتكلم واعلق باكتر من كده كلماتك متناغمه وسهله والفاظها رقيقه
اما عن مناقشة المحتوى هرجعله بعدين
تقبل مرورى :
بنت الشمس
وجهة نظرك في غاية الدقة
مش عايزين اكتر من كده
دمت بود
بالظبط
الانصراف عن الأصل الى الصورة
و التكلف
اخطاء قاتلة
و تفريغ للمحتوى
أحب منطقك دوما
حتى حينما نختلف
لم انتظر اعتذار لأنني لم ادينك
فقط اختلاف رؤى
النص بقلمي
يترجم مجموعة من النصائح
أما قضية تضييع القافية تضييع للشعر
أظنها قضية قديمة جدا جدا
لا تقصر قراءاتك على لون واحد
حتى يتسع افقك
تحية و مودة
اوعدك بتواجده القريب
بعالم المدونات
تحية لمرورك الكريم
أهلا بك
اشكر اطراءك الطيب
و في انتظار عودتك لاثراء المناقشة
دمت بخير