خارج حدود السنترة
الكورة الملغومة على حدود التماس
محتاجة صفارة اللئيم المستخبي ف المنصة
خلف الستار
منهار بيضحك ع اللعيبة المتقنة
التاريخ اللي بيحمي ضهرنا
مزروع وتد
يحكي ف كتبنا ع اللي صابرة مشتاقة لولد
ماتت نبوءته
تحت اضواءها اللي كاشفة
كل الوشوش المرشوشين بلون النجيلة و الدماء
و السند
وسط شماريخ الحقيقة المؤلمة
أصبح هدد
الصدة ردة
اللعبة رِِدة
و ال(باس) مقاس بالمسطرة
بين اللي يندب ع اللي فات
و بين اللي دايس ع الرفات الطاهره
و المونديال متزان بنجمة زرقة عايمة بين شطين قنال
موءود يا حلم الجدود
النعش خارج من بيوتنا ف مستطيل
و اللعن اللي يسد الودان
خارج حدود الحنجرة
.
تعليقات
دي قصيدة جامدة جداً
تسلم الأيادي
د.أحمد ...
كالعاده كل مـ آجي بـ أتقعد ... !!
- بغض النظر إني مش بـ أعلق كتير -
بس بجد .. ماشاء الله جميلة جداً ...
و جايه ع الخيبه اللي بتزداد كل يوم عن اللي قبله ... !!
ربنا يستر مـ اللي جاي ... !! :(
المونديال متزان بنجمة زرقة عايمة بين شطين قنال
جامدة جداً ماشاء الله ... :(
تسلم إيدك يا دوك ... (f)
تسلم ايدك والله
قصدى الكلمه الحلوه
النعش خارج من بيوتنا ف مستطيل
و اللعن اللي يسد الودان
خارج حدود الحنجرة
"قاسية اوى"
بس حلوة طبعا
وانبهرت للمرة الأولى نفس الانبهار في كل قراءة
حتى أنني استغرب ..
ازززاااي ماعلقتش لما قرأتها !!
(:
(:
جميلة بجد
بانتظار الجديد