الجمعة، 20 نوفمبر، 2009

خارج حدود السـنتـرة


خارج حدود السنترة

الكورة الملغومة على حدود التماس

محتاجة صفارة اللئيم المستخبي ف المنصة

خلف الستار

منهار بيضحك ع اللعيبة المتقنة

التاريخ اللي بيحمي ضهرنا

مزروع وتد

يحكي ف كتبنا ع اللي صابرة مشتاقة لولد

ماتت نبوءته

تحت اضواءها اللي كاشفة

كل الوشوش المرشوشين بلون النجيلة و الدماء

و السند

وسط شماريخ الحقيقة المؤلمة

أصبح هدد

الصدة ردة

اللعبة رِِدة

و ال(باس) مقاس بالمسطرة

بين اللي يندب ع اللي فات

و بين اللي دايس ع الرفات الطاهره

و المونديال متزان بنجمة زرقة عايمة بين شطين قنال

موءود يا حلم الجدود

النعش خارج من بيوتنا ف مستطيل

و اللعن اللي يسد الودان

خارج حدود الحنجرة

.

الثلاثاء، 27 أكتوبر، 2009

فيسبوكيات





فيسبوكيات

دهاليز تهييس
مخنوق في كويز
ده كلام سياسات
و العشق أهات
تصبح و تبات
تبعت صباحات
وقلوب دبدوب
اشعار لنزار
و العم جاهين
داخل في جروب
لاجل الاقصى
شعارات اضراب
علشان اغنية لعمرو دياب
حكايات للشارع و الاصحاب
اخبار أهرام
بالفيديو ياهووو
و نموت لحجاب
و نعيش على باب
حر الاحرار
يكتب تعليق
يشجب و يدين
يعجب بالـ شير
يعلن لكتاب
و الكاتب مين
مغمور مصنوع
على ايد أصحاب
اعلان ببلاش
و حسابه على مين
ده حساب مقفول
علشان تقرير
يخرس له الصوت
لأجل الصورة
بيضيف في صديق
يبعت له ورود
كحك و بسكوت
و هلال رمضان
و الحملة لخاتمة بدون قرايات
ابعت اذكار
تكسب حسنات
شغال الـ شات
انا غرضي شريف
ابو قلب نضيف
يكتب في الـ نوت
شخابيط ع الحيط
و مديح بالـ لول
و شتيمة بالـ تييت
اليوم ما ينام
موصول الليل
و زحام أفكار
في ميدان رمسيس
علشان الـ فان
حبة تهييص
يجمع تواقيع
يمنع توريث
جرب حظك
لا الحظ يصيب
و أنا أشبه مين
رايح على فين
انا تهت و تاه
مني الاحساس
مبروك مبروك
ادخل بسلام
ده مطار لما طار
في عقول الناس
دستور مسبوك
حكمه المفكوك
يعلن بقيام
دولة فيسبوك



الأحد، 11 أكتوبر، 2009

اسموزية





غمسني بين طيات ثراه , و انهال فوقي بذراتٍ من الرمال الحار . للحظات .. شعرت بحرارة الوسط و جفافه .

أغدق ماءه فارتوى الثرى و لم أرتو ِ , تحسست جدران لحدي فتذوقتهــا ملحـًا أجاجًا.

أدركت أنه لحد الزوال و هنا مرقدي الأبدي... لا بعث ...لا أمل

في اليوم التالي .. أغدق ماءه و انتظر , ارتوى الثرى و ازددت ظمأ ً , نام السر داخلي .

ممنوعة – أنا – من الارتواء , فقد وضعت الاسموزية قوانينها ... الماء للملح و العطش للجميع.

في نهاية الأسبوع .. أغدق ماءه و تأمل .....

ضاق ذرعًـا , نبش القبر و احتواني بكفه , أسمعني من لومه ما يكفي لإجهاض السر بأحشائي

صمت السر فتملكني الصمت.

ملكه الغيظ , فألقى بي بعيدًا لأتجاوز أسوار أرضه و استقر

أتحسس ما حولي فأشعر بمعنى رطوبة الندى

يغدق الماء و يطفأ الظمأ

يتغلغل الماء داخلي ليحمل السر و ينفلق الأمل


الاثنين، 14 سبتمبر، 2009

فاكرة العلقة




فاكرة العلقة الحلوة ايَّاها

يومها ايديكي

نزلت تلمس كتفي تطبطب

قبل ما تضرب

فاكرة لما بتقسي عليا من ورا قلبك

و أما عنيكي تغضب مني

ليهم بصة بتكهربني

طب ليه عينك لما تبرَّق

بُقك مش بيخبي الضحكة

فاكرة التقل المفضوح ليا

و رغمه أجيلك أترجَّاكي

خفِّي شوية

طب ضحكاية

حِنِّي عليا

و أما دلالك يوصل آخره

أبص فعينك

يلعب حاجبي

تضحكي تصفى كل الدنيا

عارفة ان انا مشتاق للعلقة

و محتاج أصغر جوا عنيكي

و ارجع تاني أشيل الشنطة

و اما بذاكر درسي معاكي

خدي بيفرح لما باخلّـص

لاجل ما ياخد منك جايزة

عارفة ان انا محتاج للجايزة

عارفة يا سرّي

صوتك لما بيحضن قلبي

م السماعة يقوللي واحشني

- لأ مش بابكي

بس تملي بتطرف عيني م الحساسية

زي ما دايما تطرف عينك

و أما أجيبلك صورة الكاميرا

أول كلمة بتطلع منك

( شاكلك خاسس

حاسب م التكييف البارد

سوق على مهلك

امتى هترجع )

عارفة الشنطة الواقفة قصادي

من كام شهر و لابسه هدومها

بس مصيبتي

ان الساعة هنا في الاوضه تلف العكس

فكرك حجر الساعة مفوِّت

و لا الاوضه في عالم تاني

مفيهوش الا عقارب صبر

عقرب صبري يا سري دبحني

و أما بفرفر بحتاج حضنك

عارفة ان انا مشتاق للحضن

السبت، 5 سبتمبر، 2009

جوهر قاللي





جوهر* قاللي
اكتب و انسى القافية شوية
حرر قلمك
انطق عبّر
حرف و معنى
فكرة و صورة
حس بنبض الكلمة الميت
و انفخ فيها
قولها كوني راح هاتكونلك

جوهر قاللي
انسى قديمك و اقلع توبك
اوعى تخاف من عورة حرفك
لولا العورة ما كنت هتبقى
شوف اطرافك فين اولها
و امحي اخرها
اصل الاخر معنى نهايتك

جوهر قاللي
اركب فكرة و ارمي لجامها
اشطح بيها و سيبها ترفرف
تعلا و تهبط
تخبط راسك
تلمس رجلك
عيش دوامة فكرك لكن
اعمل نجمة و سيب اعصابك
رغم الموجة هتفضل عايم
و كل قيودك تغطس عنك

جوهر قاللي
اوعى تخلي آخر حرف في سطرك حدك



جوهر * : الشاعر مصطفى جوهر

الخميس، 20 أغسطس، 2009

هل بهلاله


هل بهلاله الشــــهر و أنا كنت محتاجه

يمحي ضلام الهــم بالضي من تاجــــــه

يفرح قلبي الحزين بصيامه و قيامه

فرحة سجين الدهـــر يوم جاله افراجه




الجمعة، 14 أغسطس، 2009

أنت أنا



قطـــــــرتا ماءٍ مزجتا

فصارتا مثلـنا

أنت لســــت شطـري و إنمـــــا

أنت أنـــــــــا



الخميس، 23 يوليو، 2009

انسي كل ما يقال





¯انسي كل ما يقال¯

أنا معكِ و أنت معي
فانسي كـل ما يقــــال
و دعينا نحيا سويا
نسكن في قلب الخيال
حيث لا ترانا عينٌ
حيث لا نخطــــر ببـــال
معك أنت حبيبتي
معك هادئـة الجمـــــال

********

أنا معك و أنت معي
فانفضي عنك الشرود
استفيـقي من البكا
واطردي الفكر اللدود
أدمعاً تبكي السـما
آهةً تشقي الوجـــود
همنا القاسي انقضى
أمس ولّى لن يعـود
فارسمي بَسمَ الصفا
أرتقــــبه كالهـــلال
وانسي كل ما يقــال

*******


أن معك أنت معي
انسي لحظات الغروب
فالغرام فرصة ٌ
ربـــــمــا لا تــــــؤوب
فارشفي أديمه ُ
رشفةً تحيي القـلوب
و اتركي لي ساعة
تعشقين بي المحـال
وانسي كل ما يقــال


******

***

*

الجمعة، 3 يوليو، 2009

لحظة وداع






و أما نويت السفر .. سافرت دموع ع الخدود

الدمعة جمــرة بتنحت ع الوش كام أخـــــدود

سيبي الدمـــوع تنزل ما تمسحيش دمعتك

تمسـحها فرحة قلب.. يوم ما الغريب بيعـــود

السبت، 30 مايو، 2009

حلم الخلود



حلم الخلــــــود... لسه عايش في العــروق


و خمـــــر كاسه ...مش ممكن منها أفـــوق


لولاه ما كنت قتلت أخويا اللي تحت


و لا حتى كنت أكلت من الشجـرة اللي فوق

السبت، 21 مارس، 2009

قرصة ودن




لســه الألم في الودان من قرصتك يا امّه
و شد حيلك يا ولد ...ورينا بقى الهمــــة
الصوت بيأنس وحدتي في غربة وجعاني
و أديني مستني عادتك بعد العتاب ضمة

الأحد، 1 مارس، 2009

الثلاثاء، 3 فبراير، 2009

افتح شباك للقمر






الضلام مش كله مرعب
تلقى لون الحبر داكن
و لولا لونه ما كان هيكتب
افتح شباك للقمر
لسه فيه ليل السمر
لسه فيه ذكرى حلوة
قصة فاتت
لسه جوه القلب ساكنة
و ذكرياتها معايا باتت
الجميل فيها البراءة و النعومة
عود يدندن لحن ذكرى
و بالنغم تغني ثومة
بألف ليلة
اسمع كمان
ده صوت ادان
و البلابل راح تزقزق
طب تصدق
الضلام اللي انت خايفه
ايوة عارفه
خلف بابك اللي قافله
فينه راح!!!
لسه شايفه!!!
هِدْ بابك اللي خانقك
تلقى نور الصبح شقشق