ليلة القبض على وجه جديد


مقدمة
فانتازيا
بدأت بمداخلات متبادلة بيني و بين صديق عزيز (تيتو) عن نقد العروبة برباعيات
في النهاية
تخيلت ان أعز اصدقائي يوشي بي للسلطات
فيتم القبض عليّ
في فانتازيا خفيفة الظل
ما ذكرني بها سببين
بعض الترويح
ويمكن ان نعتبرها
نداء لصديقي كي يعود للتدوين مرة أخرى
أتم الله عليه نعمة الصحة و العافية



ليلة القبض على وجه جديد

اكتب
اكتب اسمك
و اسم ابوك و كمان امك

طبعا خالك و أكيد عمك
اكتب حتى فصيلة دمك

اسمي
اسمي
اسمي ايه والنبي يا شباب
وجه جديد

وجه جديد يا كداب؟!
مش شايفه اتشلفط بالقبقاب

آهين على زمن الأصحاب
ماشي يا صاحبي

***

يا فوزية
قولي مين هو

و الله ماعرف المخفي دا هو

طخ طخ
كده تفتكري

آه يا دراعي
ايوه خلاص
هو ده يعني
يبقى زمان الجو بتاعي

ايه نشاطاته
و ايه هواياته

ده خيبان
و أنا من خيبته
طبعا سيبته
و اتجوزت سيد سيده كمان
(بقى كده يا فوزية ما طمرش فيكي الكابتشينو)

***

ازيك يا حاج عثمان

اهلا يا بني
بس مين انت

لا ما تسأل
انا بس اللي ممكن اسأل
طبعا فاهم

أكيد فهمان

عارف مين ده

ايوة دا بني
دا واد غلبان

بكرة هتطلع في الاذاعة تقول بيان
هتقول ايه

هقول تلفان
و صابه جنان
و قلبي و ربي عليه غضبان

ايوة تمام
اب مثالي

سيبني و النبي
أروح لعيالي
راح الغالي
بس احوط ع اللي بقالي

***
و بعد سنييييين كتييييير خرج وجه
بس خرج وجه قدييييييييييييم جدا

ترن ترن

ألو
مين
اتكلم
(.....)

اهلا اهلا
طب ما تمسي و لا تسلم

(.....)

بتقول ايه
لازم احاسب

(.....)

طيب ليه
هو انا متراقب

***
رقم تلاته يا رقم تلاتة

ايوة يا ريس عايز حاجة

اللي معاه ده يطلع ايه

ايوه دا صاحبه اللي بلغ فيه

رقم سته يا رقم سته

ايوة يا ريس عايز ايه

راقبوا أهله و راقبوا بيته
شوفوا شغلكوا بقى و لا نسيتوا

ايوة يا ريس
دا اسمه تيتو
عارفين حتى بصمة صوته

خلاص اكلم القيادة
عايزة تعرف اللي جري
ايوة يا فندم

(.....)

بيشربها سادة

(.....)

الوضع تحت السيطرة


تمت

تعليقات

‏قال ناعومى
ههههههههههههههههههههههههههه
دانت كمان عامل نيو لوك اهو
هههههههههههههههههه بجد ضحكتنى فانتازيا جميله اوى
اتمنى تيتو يشوفها ويستجيب ويرجع بقى يكتب تانى وينورنا ...
بجد ياادكتور احمد
انت قلم لسا مخبى علينا كتير
كل مره اتاكد انك مبدع حقيقى بجد والله مش بجامل
ربنا يبارك في موهبتك يافندم ونشوف كل مره جديد

على فكره انا ناويه ابلغ عن صوحابى اعمل حسابى وابلغ عنك انت كمان بالمره لزوم الواحد يوجب برضه

صباحك خير ان شاء الله

اه صحيح انا كنت بحا ول اعمل نسيو لوك فرايحى قبل كده ههههههههههههههههه
ومش عارف م عرفتش ابان فرايحى ولا ايه
بس حجرب تانى انا كمان نفسى اغير السواد اللى فى المدونه دا ....
بحب اوى ( البلاك كوميك )

و طبعا الرباعيات

لون جديد و جميل

و دعواتى لصديقك بالعوده لعالم التدوين
‏قال blue-wave
مش بقولك انك موهوب بجد؟
اسلوبك مميز وكلامك سهل سلس بس معبر
ماسك بزمام اللغه وتفكيرك سابق زمنك اصلا
بجد بجد تحفه يابوحميد
يا عم تيتو ارجع دون تانى الله يسترك ..
بدل ما الموضوع قلب اهو ببوليس و معتقلات و قانون الارهاب ... ويجعل كلامنا خفيف عليهم ..

دكتور احمد .. قلت لى رقمك كام ؟؟؟
تدوينة صادقة الى حد الوجع .
‏قال سنووايت
:)

فانتازيا جميلة
وعجبني جدا الجزء الاول

اكتب
اكتب اسمك
و اسم ابوك و كمان امك
طبعا خالك و أكيد عمك
اكتب حتى فصيلة دمك

تمنياتي بعودة تيتو للتدوين
بس كان فيه سؤال نفسي اساله من زمان واعتقد ان الموضوع دا اوضح لي كثير
ما المقصود بوجه جديد؟
‏قال Radwa

ههههههههههههههههههههههه
انا مش فاهمه حاجه
هو ايه الموضوع بالظبط
..........................
سندريلا
‏قال r
هو استجواب جميل وفتازيا ساخر جميل
بس تعتقد ان هيكون فى فرصه انك ترد أو تقول اى حاجه ساعتها
دايما شكل المخبر لو فاركره فى افلام اسماعيل ياسين بتيجى فى مخى لما بشوف مخبرين اليومين دول وعالم حاتم اللى هو بس فيه خير لمصر--- افتكرته هنا بردوا
دكتور احمد
شكل بوستك دا جديد عليا اوى
يا ريت تكرره بافكار تانيه مرات تانيه
لان شر البليه ما يضحك فعلا
ودا حالنا اكيد
سلمت اخى العزيز
‏قال ابو احمد
حاجه جميله يادكتور أحمد
انا لسه صاحى من النوم اول حاجه أقراها انت اكتشاف جميل بالنسبه ليا
تحياتى
‏قال نورانة
ههههههههههههههههههههههههههه
توحفة قوي ما شاء الله يا دكتور
ويا رب أستاذ تامر يرجع لقلمه الجميل تاني
صوت الضحك كان عالي جدا يا وجه جديد
وجيراني هاديين ومحترمين وبيزعلوا من الصوت العالي .............
حرام عليك بجد .......لاني بضحك تاني
وبصوت اعلي .......
احتمال يرفعوا علي قضيه ويقولو بتضحك بصوت عالي ........
تدوبناتك كلها حماس وحب للحياه
واللي اجمل منها ردودك وتعليقاتك
انت محاور جميل جدا فكر تبقي مذيع يا وجه جديد .
بضحك تاني .......اعمل ايه طيب في جيراني !!!والقضيه !!!والمحامين اللي بيطالبوني
في تعويض 100000
لحرمانهم من التعاسه الابديه
بصوت ضحكي العالي

في انتظار تعليقاتك الجميله علينا كلنا
ولو عندك الحكايه تحت السيطره
بالفانتزايا بتاعتك ديه
بقي ضحكي خارج نطاف السيطره
‏قال غير معرف…
دمها خفيف .. جدا

فكرتني بالمبكاه الملهاة ..

نحن كشعب .. يحتاج لشعب ..

ولا تسألني كيف فلست من هذا النوع الذي يميل للنصح

اعاننا علي الحياة :)
‏قال أسماء علي
ههههههههههههههههههه

يا دكتور انا حافظة البتاعة دي من ايامها

و بعد كده اموت وافهم تيتو مُختفي فين

ماتكونش بلغت عنه ؟؟

شكلك كده

ههههههههههههههههههههههههههه

بجد باحب البوست ده جداااا
‏قال Ahmed Othman
أاااه بقى كده يا ناعومي

تتغدي بيا قبل ما اتسحر بيكي

جميل قوي النيولوك اللي عاملاه الصراحة

تحسي ان فيه دعوة للتفاؤل

شيء جميل و جديد
تمنياتي بالتفاؤل دائما
‏قال Ahmed Othman
سهر
كانت محاولة لطرق ابواب اخرى
ربما يجد الانسان في نفسه
ما غاب عنه
و تبقى المحاولة مجرد محاولة
تحياتي
‏قال Ahmed Othman
د/ عمرو
سعيد جدا بتواجدك
و أسعد بتعليقك
خاصة عندما يخرج من قلم له حضور و رؤية خاصة كقلمك
تحياتي
‏قال Ahmed Othman
سمر
ليته يسمع همساتك و يعود

ما تنسيش العيش و الحلاوة
و علبة السجاير
رغم اني لا ادخن
بس نتقي بيها كفوف المخبرين

تحياتي لتعليقك المرح
و اخرى لحضورك المرتقب دائما
‏قال .:.-=- ELGaZaLy-=-.:.
الحوار روعة وخيالك خصب للغاية..
بجد جميلة اوى
‏قال Ahmed Othman
سنووايت

وجه جديد هو وجه جديد اقابل به الحياه
فقط لأقنعها اني قادر ان احيا
رغم انف طواحينها

سعدت كثيرا لتواجدك و تعليقك الجميل
‏قال Ahmed Othman
سندريلا
اوعي تقلقي
مفيش اي حاجة
الوضع تحت السيطرة
مجرد بعض الترويح
أو
فاصل و نعود

تحياتي
‏قال Ahmed Othman
الكريمة/ بسنت
عايزاني أكرر تاني
مش كل مرة تسلم الجرة
عموما
انا ممكن اعتبر كلامك ده
(تحريض) على الشغب
و أهو فرصة تقربي من سنيما الواقع
و تشوفي الابطال على الحقيقة
بدل ما تتخيلي افلام زمان

طبعا بعد الشر عليكي
ان شاء الله احاول
بس المشكلة في الغزالة

تحياتي لتواجدك المرتقب دائما
‏قال Ahmed Othman
د/ مجدي
بالتأكيد اكتشاف يسعدني
ففي صباح كل يوم أكتشف بي الجديد
يبدو انني لم أكن أعرفني من قبل

صباح شريف دكتورنا
صباح الفل
‏قال Ahmed Othman
نورانة دائما منورانة
فعلا تامر اختفى فجأة
شفاه الله و عافاه
بعض الظروف المرضية
و يعود ان شاء الله

تحياتي لتواجدك
‏قال Ahmed Othman
سمو الاميرة/أميرة جمال
اليوم فقط امنت بأن الضحك عدوى
بمجرد قراءة تعليقك
و انا اتعرض لنفس الاعراض
ربما يعلوها هيستريا ضحك
المشكلة سيدتي
ان جيراني الأعزاء
سيطالبون تعويضهم
(بالريــال)

فقط كل ما أستطيع قوله
(علّي الضحكاية علّي)
ربنا يسعد أوقاتك
كل التحية و الشكر
على التعليق الجميل
‏قال Ahmed Othman
جومانا حمدي
شعب يحتاج الى شعب

موجز المقال
و نهاية السؤال
تعليقك هذه المرة
هي المبكاة المبكاة
و واقع لا نحب أن نحياه
‏قال Ahmed Othman
د/ اسماء
من منطلق ضربني و بكى و سبقني و اشتكى

باين فعلا اني اللي سبقت و بلغت على الجدع
و رجعت انشر الفانتازيا دي للتمويه طبعا

بالتأكيد
نشر من بعض ماضينا
يحيي بداخلنا ذكريات حلوة

تحياتي لتواجدك
و تعلقاتك التي اعتبرها
ميزان ما أكتب
‏قال Ahmed Othman
المبدع / محمد الغزالي
تحية راقية
و تشريف عزيز
اتمنى التواصل
و تبادل الافكار
خاصة بعد زيارتي السريعة
لمدونتك مصر ياما
التي هي بمثابة كنز بالنسبة لي

طاب قلمك
‏قال tito
بسم الله
دكتور أحمد
ما شاء الله عليك وعلي كتاباتك
بس فين مرثية العروبه
أنا دورت عليها علي المدونه ومش لاقيها
يا تري لسه محتفظ بيها ولا ضاعت زي الحاجات اللي ضاعت علي ( عيون )
مودتي واحترامي