لما تلاقي الخوف يتسلل
جوه ضلوعك
و أما تلاقي الدنيا اتسدت
و مفيش مهرب
إلا دموعك
مين هيعينك
بيني وبينك
غمض عينك
؟
؟
؟
لما تلاقي كلمة حق
و مالهاش صاحب
و يوم ما تقولها
ده بيلومك
و ده بيعاتب
تلقى الناس بلسانها التالف
مش بتحاسب
مين هيعينك
بيني وبينك
غمض عينك
؟
؟
؟
لما تلاقي الجوع في بلدنا
واقع صاير
و الاقطاعي وسط نعيمه
عايش طاير
و يا مسكين مش لاقي وظيفة
تصلب طولك بلقمة عفيفة
و هدمة نضيفة
و ايد على خدك
و ف بلكونتك قاعد حاير
مين هيعينك
بيني وبينك
غمض عينك
؟
؟
؟
لما تلاقي في نص الشهر
جيبك خالي
و الاسعار طالعة في العالي
رز و سكر
لحمة و كوسة
سمنة و زيت
أما دي حوسة
و المسئول ببرود أعصابه
جاهز برضة
برده الآلي
مين هيساعدك ع اللي في بالي
مين هيعينك
بيني وبينك
غمض عينك
؟
؟
؟
لما يمد ايديه في جيوبك
بحركة مريبة
ياخد زي ما ياخد منها
و يسمي افعاله ضريبة
أما عجيبة
لما هيشفط نص مهيتك
مين هيعينك
بيني و بينك
غمض عينك
؟
؟
؟
لما تلاقي جندي أميركي
جوه الدار
يؤمر يحكم وسط الشارع
ليل و نهار
ازحف
ارقد
و لو مش عاجبك
أو متضايق
مش هتشوف غير ضرب النار
مين هيخلص منه التار
مين هيعينك
بيني و بينك
غمض عينك
؟
؟
؟
لما تلاقي كلاب الغرب
من جرائتها
عليك بتهوهو
و اما تلاقي قطط الشرق
جوه في بيتها
قاعدة تنونو
و أهو ده يرسم
و أهو ده يشتم
فيك و في دينك
و المتواطئ قاعد ساكت
عينه في عينك
مين هيعينك
بيني و بينك
اوعى تغمض
ربي يعينك
؟
؟
تعليقات
صدقت فيما وصفته..
وعشان نعلى ونعلى ونعلى
لازم نطاطي نطاطي نطاطي
هكذا اوهمونا ....
دمت بكل ود..
خالص تحياتي
صاحب أرق ومضات تنير الفكر
لا أعتقد انه باستطاعتنا أن نطاطي أكثر
فما عاد دوننا شيء
نحن يا سيدي تحت الثرى
شرفت باطلالتك
فلا تحرمنا البقاء
جذبنى لبيتك الجديد تعليق تركته
فكرك وضاء
الشعر ده حر .. وصادر عن شخص حر قوى
ربى يعينك
كوبليهات غنائيه وصلتها لينا بتغميضه بينيه
تقريبا غطيبت فيها كل ما يدور فى حياتنا ..بفكر عالى ..ونظره ثاقبه
انا بحيى دماغك بجد
مدونتك حلوه وجوها شديد
سلامى
SAGI
شرف لي و أنا أخطو خطوات بدايتي
أن أنال اهتمامكم و تقديركم
وجب عليّ أن أشكر التعليق الذي دعاك لمدونتي
و أشكر حرصك على ابلاغي رسالتك
رسالة هامة
أن الحروف التي ننثرها
لا تموت
شكرا لزيارتك
و نتمنى التواصل
السرقة شغالة والنهب كمان
وف الآخر يقولوا
هنزودلكم المرتب مية
ونشيل من الدعم خمسماية ..
...
جيت على الوجيعة ..
جيت على الهم ..
...
نص بجد حلوو جدا
وعلى فكرة عجب ماما جداا
جميله جميله جميله
التلات ورقات
شعار هذه المرحلة
و فوازير الدعم حتى الدمع
في رمضان و غير رمضان
تحياتي للسيدة الفاضلة
أم أسماء
لقراءة واعية
و احساس بنبض الناس
تعرفي المفارقة
غمض عينك دي اتكتبت في غمضة عين
يمكن يكون لمس الواقع هو السبب
تحياتي لتشجيعك الدائم